A Asociación Cultural Arumes do Corgo convoca o XVI certame literario Terras de Chamoso

A organización do certame non quere limitar a imaxinación dos autores. A única norma é que a obra se redacte en lingua galega.

Categorías:
Categoría infantil (dos 10 aos 13 anos, incluídos).
Categoría xuvenil (dos 14 aos 17 anos, incluídos).
Categoría adultos (maiores de idade).
Os anos míranse na data da convocatoria do certame: 1 de outubro de 2022.

Modalidades:
Poesía (de 30 a 60 versos)
Relato curto (de 3 a 6 folios escritos a dobre espazo).
A categoría infantil non ten límite de espazo inferior, pero si superior.

Premio “A Legua Dereita”:
Categoría infantil (dos 10 aos 14 anos).
Relato curto (de 3 a 6 folios escritos a dobre espazo).
Temática: A cultura tradicional galega.
Entre os relatos curtos da categoría infantil que participen neste certame, o premio especial “A Legua Dereita” pretende destacar aquelas creacións que poñan en valor e enxalcen a cultura tradicional galega. O xurado considerará como elixíbeis para este premio aquelas obras que relaten feitos ou costumes da vida cotiá do noso pobo que aconteceron, ou poderían ter acontecido, na sociedade galega de antano. Poderán ser, por exemplo, lendas, contos, historias de namorar, relatos sobre a música e o baile tradicional ou acontecementos históricos, entre outros.

Presentación: cada participante poderá presentar varios traballos (non premiados noutros certames literarios). Entregaranse mecanografados (non é necesario na categoría infantil) indicando a categoría, modalidade, título e pseudónimo e achegando nun sobre pechado a información persoal: nome, apelidos, data de nacemento, enderezo, DNI, correo electrónico e teléfono de contacto. Remitiranse ao seguinte enderezo:
A. C. Arumes do Corgo.
Antigas escolas do Corgo s/n,
27163 O Corgo.
Lugo
Tamén se pode enviar ao correo-e: arumescorgo@gmail.com.
Deberán enviarse no mesmo correo dous arquivos en formato PDF, un co contido da obra e outro co lema que distinga o traballo, no que constará, no seu interior nome, apelidos, data de nacemento, enderezo, DNI, correo electrónico e teléfono de contacto. Este segundo arquivo, será custodiado pola xunta directiva da Asociación Cultural Arumes do Corgo, entregando unicamente ao xurado a obra e o lema da mesma.

O prazo de entrega estará aberto ata o día 27 de novembro de 2022.
A entrega de premios farase nun acto cultural, musical e literario con moitas sorpresas o sábado, 17 de decembro de 2022 no Centro Sociocultural do Corgo.

Premios: para cadansúa categoría establécense 1º e 2º premio de poesía, e tamén 1º e 2º premio de relato.
Cada premio consiste nunha figuriña de cerámica do país, un lote de libros e o correspondente diploma.
O premio “A Legua Dereita” contará, a maiores da cerámica do país, dun lote de libros relacionados coa cultura tradicional galega e do diploma acreditativo, cun instrumento musical galego.

http://arumescorgo.blogspot.com/ 

O sábado día 22 de outubro celebrouse a XIII carreira populara do Corgo memorial Quique Casanova.

Resultados da XIII carreira popular do Corgo memorial Quique Casanova

GALERÍA FOTOGRÁFICA

Resultados do primeiro exercicio do proceso selectivo de sete prazas de Auxiliar de Axuda no Fogar

O Concello de O Corgo organiza a XIII Carreira Popular Concello de O Corgo-Memorial Quique Casanova, patrocinada por Grupo Leite Río. A proba organizarase o vindeiro Sábado 22 de Outubro, con saída e meta nas instalacións da Praia fluvial do Río Chamoso do Concello de O Corgo.

Participación: A proba estará aberta a tódolos atletas, federados ou non.

Percorrido: O circuíto de 10.5 km será sobre terra na súa maioría e estará pechado a todos os vehículos agás os autorizados pola organización. A saída da proba e a meta será na Praia fluvial do Río Chamoso.

Inscrición: Ata o martes 18 de outubro ás 23:59 horas.

Retirada de Dorsáis: Os dorsáis retiraranse o venres pola tarde na tenda de deportes de “Atmosphera Sport A Chaira” sita na rúa Salvador de Madariaga e o día da proba pola tade na zona habilitada pola organización na zona de saída, ata 45’ antes da saída da proba.

Peche de control: O control de chegada na proba absoluta pecharase 70’ despois da saída da mesma.

Premios en metálico.

Inscripción.:  https://www.carreirasgalegas.com/inscripcion/xiii-carreira-popular-concello-de-o-corgo/e20b80d0-e943-79bf-54f8-3a02f230ab19/grupo-1.

A Fundación de Amigos de Galicia ofreceu á Biblioteca do Punto de Atención á Lectura do Corgo unha significativa doazón de máis de medio milleiro de exemplares. Nunha emotiva cerimonia que tivo lugar o sábado 8 de Outubro nas instalacións da referida biblioteca, o presidente da Fundación de Amigos de Galicia, D. Ramiro Varela Cives, acompañado por unha nutrida comitiva de doadores, procedeu á entrega de numerosas caixas con libros que pasarán a integrar os fondos bibliográficos postos á disposición de todas as persoas interesadas na súa consulta.

A Biblioteca PALCO, situada a carón do Punto de Atención á Infancia e da Casa das Asociacións, é un servizo público e gratuito inaugurado polo Concello do Corgo a través do Proxecto CORGORAL  o pasado 23 de Abril, Día mundial do Libro. Actualmente e grazas ás xenerosas doazóns de numerosos particulares e institucións, conta con varios milleiros de libros que se poden consultar de balde. O correo de contacto é proxecto.corgoral@gmail.com

O Concello do Corgo acaba de engadir ao seu patrimonio a deradeira adquisición, unha finca sita no polígono 1, parcela 17,  na saída de San Xoán do Corgo pola vía Díaz Castroverde hacia a urbanización o Souto. Trátase dunha  finca de algo máis de 5 hectáreas,  que contén unha nave agropecuaria, e que ben a sumarse ás adquisicións municipais que se fixeron ultimamente, como a Cámara agraria, o Castro de Castrillón ou unha finca no núcleo do Corgo,  para equipamentos, colindante con outra  parcela de titularidade municipal.

Proceso selectivo de 7 Auxiliares de Axuda no Fogar. Acordos do tribunal,data, lugar e hora das probas.

O mércores 28 de setembro publícase a Orde pola que se establecen as bases reguladoras das axudas para facilitar a obtención dos permisos de circulación das clases B, C e D  á mocidade galega, dirixidas ás persoas inscritas no Sistema  nacional de garantía Xuvenil no ámbito da Comunidade Autónoma de Galicia, cofinanciado polo Fondo Social Europeo, Programa operativo de emprego xuvenil 2014-2020, e se procede á súa convocatoria para o ano 2022 ( Código de procedemento BS321A)

O importe da axuda será de 400 euros para a obtención do permiso de condución da clase B; de 650 para o permiso da clase C e de 1.300 euros par ao permiso da clase D. O importe será acumulativo no caso de que unha mesma persoa  solicite a axuda por dous ou tres permisos obxecto da orde.

Os requisitos esixidos son.

1. Ter cumpridos os 18 anos, sen perxuízo da idade mínima para a obtención dos permisos da clase C e D, e que non superen a idade máxima que estableza a normativa vixente do Sistema nacional de Garantía Xuvenil.
2. Estar empadroado/a na comunidade autónoma de Galicia cunha antigüidade mínima dun ano.
3. Estar inscrito  no Sistema Nacional de Garantía Xuvenil e figurar como beneficiario no ámbito da Comunidade Autónoma de Galicia.
4. Ter o/os permiso/s de conducir para o/os cales se solicite a axuda con data de expedición entre o 1 de decembro de 2021 e a data de presentación da solicitude.

As solicitudes presentaranse obrigatoriamente por medios electrónicos a través do formulario normalizado dispoñible na sede electrónica da Xunta de Galicia. O prazo será dun mes contado a partir do día seguinte á publicación da norma.

Enlace á normativa.

Publicación dos resultados do proceso selectivo de contrataciòn dun CONSERXE para o CEIP do Corgo.

O vindeiro sábado 24 de Setembro, a biblioteca do Punto de  Atención á Lectura, acollerá a partir das 18h a derradeira actividade da programación cultural do verán desenvolvida polo Proxecto CORGORAL: un serán de xuntanza, convivencia e diálogo entre persoas vencelladas a estas terras. Esta reunión ou polafía (https://www.aelg.gal/Polafias/) está organizada en colaboración coa Sección de Literatura de Tradición Oral da Asociación de Escritores en Lingua Galega e contará coa presenza de numerosos convidados que falarán de diversos aspectos do Corgo.
Neste encontro todas as persoas presentes poderemos gozar dos coñecementos de persoas tan importantes para O Corgo como poden ser Felipe Labrada (alcalde), Marco Antonio García-Gabilán (secretario), Oscar G. Murado (cura de doce parroquias do concello), Jesús Abuín (cronista oficial), Domingo P. Lidor (xuíz de paz), Xosé Manuel Castro (profesor)…
Todo isto sen esquecer aos representantes de varias asociacións locais como Mario Outeiro (A. C. Arumes), Consuelo Vázquez (Centro de Estudos do Corgo), Manuel Rodríguez (Cinco Ríos), ou Roberto Besteiro (A Legua Dereita).
Tamén estarán connosco varios artesáns locais, verdadeiros mestres no traballo do ferro (Antonio Fernández) ou do barro (Manuel López), que nos contarán os segredos da última forxa en activo no Corgo e da maior colección privada de cerámica tradicional que existe no noso concello. E tamén poderemos conversar con Benedicta Sánchez, actriz revelación, premio Goya e medalla Castelao. Estades todos convidados e agardamos a vosa presenza para pasarmos xuntos un serán inesquecible, cheo de contos, lendas, historias e sucedidos.