Este sábado 11 de Novembro terá lugar, a partir das 19:00h no PALCO – Punto de Atención á Lectura do Corgo, o faladoiro titulado “As preocupacións de San Martiño”. Aproveitando esta efeméride do santoral, o cura párroco do Corgo, Óscar G. Murado, disertará sobre a figura deste home santo, sobre a súa época e sobre os seus escritos. Precisamente o noso orador convidado, doutor en Historia da Igrexa pola Universidade Pontificia Gregoriana de Roma, defendeu previamente con éxito a súa tese de licenciatura hai exactamente quince anos, baixo o título San Martiño de Braga perante o paganismo. O público asistente terá a posibilidade de entender mellor este senlleiro personaxe, bispo dos suevos, así como a súa coñecida obra De correctione rusticorum. Xa o sabedes: agardamos por vós no PALCO, este sábado 11, a partir das 19:00h.

O Proxecto CORGORAL organiza o vindeiro venres 10 de Novembro unha velada poética a partir das 19:00h no PALCO – Punto de Atención á Lectura do Corgo. O recital correrá a cargo da escritora Ánxela Gracián, natural de Castroverde, poeta e tradutora varias veces galardoada polos seus traballos e con fondas raíces familiares na parroquia corguesa de Queizán. O acceso a este evento será libre e de balde, ata completar o aforo. Todas as persoas que asistan á velada poética levarán un libro da autora como agasallo. Así que, xa o sabedes: agardamos por vós no PALCO, este venres, a partir das 19:00h.

Este ano 2023 conmemórase o centenario da creación do Seminario de Estudos Galegos, unha institución cultural de referencia, que naceu á marxe das instancias oficiais para fomentar o amor pola terra sobre a base do seu mellor coñecemento. O Concello do Corgo, a través do Proxecto CORGORAL, celebra esta efeméride con unha conferencia da historiadora da arte e investigadora Iria-Friné Rivera Vázquez, titulada “O ollo atento. O espírito internacional do Seminario de Estudos Galegos”. A palestra, de acceso libre e de balde ata completar o aforo, irá seguida dun faladoiro e animado debate co público asistente. Este acto terá lugar o vindeiro venres 3 de Novembro a partir das 19:00h na biblioteca do Punto de Atención á Lectura do Corgo – PALCO.

Este 27 de Outubro, como todos os últimos venres de cada mes, agardámosvos no
Punto de Atención á Lectura a partir das 19:30h para comentarmos unha obra literaria de
referencia para as nosas letras. Desta volta é a vez do marabilloso libro A praia dos afogados,
do escritor Domingo Villar. Trátase dunha novela policial na que o mar, os barcos e os
mariñeiros das Rías Baixas xogan un papel fundamental á hora de esclarecer un suposto
suicidio ou, se cadra, un brutal asasinato que o inspector Leo Caldas debe resolver. Para
comprendermos mellor as entrañas desta obra contaremos coa presenza e coa axuda do
profesor Xosé Manuel Castro Castedo e da escritora Ánxela Gracián. Agardámosvos!

Ao longo do último trimestre deste ano permanecerá exposta no Punto de Atención á
Lectura do Corgo – PALCO a exposición titulada Sentinelas do desleixo. Trátase dunha mostra
fotográfica temporal que recolle un total de catorce imaxes en branco e negro
correspondentes a outros tantos pombais tradicionais corgueses. Esta iniciativa xorde no
ámbito do Proxecto CORGORAL, co obxectivo de amosar a relevancia e a beleza estética
destas construcións. Asemade, preténdese sensibilizar aos axentes públicos e privados sobre a
necesidade de preservar axeitadamente o patrimonio cultural para podelo transmitir nas
mellores condicións posibles ás vindeiras xeracións. As persoas interesadas en visitar esta
exposición deberán concertar cita previamente, poñéndose en contacto co Concello do Corgo
ou no correo proxecto.corgoral@gmail.com

O martes 24 de Outubro é o Día da Biblioteca. Por este motivo, o Concello do Corgo, a través do Proxecto CORGORAL, celebra no Punto de Atención á Lectura unha nova xornada cultural. Todas as persoas que se acheguen ao PALCO entre as 10:00 e as 14:00 horas recibirán un agasallo moi especial: o libro recompilatorio que recolle os contos tradicionais do concello do Corgo, así como unha segunda obra de balde, a escoller persoalmente polas persoas que nos visiten. Así que xa o sabes: vinde a celebrar connosco o Día da Biblioteca!

Este sábado 21 de Outubro, por iniciativa do Proxecto CORGORAL e coa colaboración da Área de Cultura da Vicepresidencia da Deputación Provincial de Lugo, será representada a partir das 20:00h na biblioteca do Punto de Atención á Lectura do Corgo a obra de teatro “A tortilla e a peste”. A posta en escena correrá a cargo da compañía Nova Escena, no ámbito do Circuíto de teatro afeccionado 2023. Xa o sabedes: agardamos por vós, na biblioteca do PALCO, para gozarmos xuntos deste novo serán cultural!

A biblioteca do Punto de Atención á Lectura do Corgo acolleu o pasado venres 22 de
Setembro o primeiro Club de Lectura do PALCO. Este encontro literario entre un escritor ben
coñecido e os seus lectores foi organizado no marco do Proxecto CORGORAL, co propósito de
fomentar a convivencia entre a veciñanza e consolidar unha comunidade cultural propia nas
Terras de Chamoso.
Inscribíronse nesta orixinal iniciativa máis de unha ducia de persoas, entre as cales
figuran o cura párroco do Corgo, Oscar G. Murado, a coñecida actriz Benedicta Sánchez, o
profesor Xosé Manuel Castro Castedo, as responsables do Punto de Atención á Infancia do
Corgo…
A obra escollida nesta ocasión foi a novela de intriga O conserxe, escrita por Xosé Luís
Vázquez Somoza. O evento contou coa presenza do autor, que, ao longo de case dúas horas,
compartiu cos seus lectores varios dos segredos que se acochan nas páxinas deste grande
éxito editorial, recentemente incorporado aos fondos bibliográficos do PALCO.

ACTO PÚBLICO ABERTO NA BIBLIOTECA DO PALCO DO CORGO. (PUNTO DE ATENCIÓN Á LECTURA)

O vindeiro sábado 23 de Setembro, por iniciativa do Proxecto CORGORAL, celebramos
unha nova xornada cultural na biblioteca do Punto de Atención á Lectura do Corgo. As
actividades programadas para este serán son unha dobre presentación literaria e unha charla
de temática histórica.
A partir das 18h, Eladio Castedo, escritor corgués e veciño de Chousa, dará a coñecer
as súas dúas últimas creacións literarias: La rosa del azafrán e Parejo al tiempo. O autor
conversará co público asistente sobre os seus libros e sobre o proceso da escrita desde unha
perspectiva autodidacta.
Máis logo, por volta das 19h, será a vez de Xosé Luís Pérez Castro, avogado corgués e
veciño de Sabarei, quen impartirá a conferencia titulada “Galicia: un nome para dous reinos”.
Neste faladoiro, acompañado por numerosa cartografía histórica, disertará sobre as varias
Galicias europeas: a ibérica e a eslava, salientando as súas semellanzas e diferenzas. Así que xa
o sabedes: agardamos por vós, na biblioteca do PALCO, a tardiña deste sábado!

Grazas a unha nova iniciativa do Proxecto CORGORAL, o Concello do Corgo estivo
presente no XVI Congreso Internacional de Antropoloxía celebrado a semana pasada na
cidade da Coruña. Esta reunión científica, na que participaron mais de setecentos especialistas
oriundos de diversas institucións europeas e latinoamericanas, foi organizada conxuntamente
por AGANTRO – Asociación Galega de Antropoloxía e ASAEE – Asociación de Antropología
del Estado Español.
O congreso artellouse nun total de corenta e un simposios temáticos, entre os que
destacou, por ter sido o máis concorrido, o monográfico titulado “Memorias desencadeadas:
reciclaxes do pasado no presente e no futuro”, coordenado por Francisco Ferrándiz Martín, do
CSIC – Consello Superior de Investigacións Científicas. Neste simposio foi presentada con gran
éxito e moito interese por parte do público asistente unha comunicación específica sobre as
recollas da memoria oral relativas á parroquia corguesa de Adai.